Ko Te Whakamārama o Te Tohu Nei

Ko te tohu a Tūmatauenga te īngoa o te tohu nei e hāpaitia nei e Te Whare Tū Taua o Aotearoa.

I ahu mai te tohu nei i te hōhonutanga me te taumahatanga me ngā taonga katoa i puta mai i raro i te maru o Tūmatauenga. Ka kitea e te tangata e mau ki te tohu nei, he Pia, he Tauira, he Toa ā Tū-kariri, ā Tū-kaitaua, ā Tū-whakamoanaariki, ā Tū-matauenga.

Ka mau te tangata nei ki tēnei tohu ka hāpaitia i tēnei Whare Tū Taua, ahakoa he pikinga he hekenga rānei, ka kitea i te Ao whānui.

Ko te kōkōwai o te tohu nei, he toto i ahu mai i te wehenga ā Ranginui rāua ko Papatūānuku, ki ngā whawhai i waenganui i ngā Atua, tae noa ki te tini me te mano kua hinga i ngā wā o mua i raro i te ahuatanga o Tūmatauenga hei putake mō Te Whare Tū Taua o Aotearoa.

Ko te taiaha ki tōna ringa katau he hononga ki ā Tane Mahuta ki ā Tū hoki me ngā taonga tuku iho i tukuna e ngā Kuia, e ngā Koroua o te Ao Kōwhatu hei oranga mō te uri whakatupuranga o tēnei Ao Matemate.

Ko tētehi taha e mau rakau ana, tētehi e kore e mau ana i te tūhonohono ki te Mana Tane me te Mana Wahine me kī, ki ā Ranginui rāua ko Papatūānuku me ngā taonga tuku iho i heke mai i te Ao Tāwhito, tae noa ki tēnei Ao Matemate.

Ko te mātauranga katoa i tēnei Whare Tū Taua tēnei kaupapa e hāpaitia ana.

He hononga Taonga
He hononga Tangata
He hononga Tupuna
He hononga Atua
He hononga ki a Tūmatauenga


Nā Te Waitere Jason Paahi i takoha mai
Taura Pouwhakarae